Hrikalega hallærislegt!

Fylgdist með öðru auganu með "blaðamannafundi" Sjálfstæðismanna í borginni. Hef nú sjaldan séð jafn hallærislega útsendingu. Þeir náðu ekki að halda tímann sem fréttamenn höfðu verið boðaðir á og mátti sjá þá eirðarlausa á göngunum í Valhöll í rúman klukkutíma allt í beinni. Þetta var nú allt hálfgerður brandari. Best var þó þegar Hanna Birna og Gísli laumuðust út um kjallaradyrnar og myndavélarnar rétt náðu baksvipnum á þeim.

Síðan þegar gamli góði Villi birtist svo þá var þetta allt hið kjánalegasta, engin yfirlýsing, ekkert búið að ákveða og hann spurði bara fréttamennina hvernig þeir vildu hafa þetta... sem klárlega urðu fyrir miklum vonbrigðum enda búið að magna upp stemminguna í nokkurn tíma og menn hafa búist við einhverjum fréttum. Ekki nóg með það heldur var fréttamönnum mismunað þar sem aðeins ljósvakamiðlar fengu að vera inni þegar "yfirheyrslan" fór fram. Efast um að blaðamannastéttin sé kát akkúrat núna... nú þurfa forsvarsmenn blaðanna (þ.e. sjálfstæðismennirnir) eflaust að róa sitt lið svo ekki fari út "óheppilegar" fréttir af þessari hlægilegu uppákomu.

Annars var Villi kallinn bara brattur, ætlar að halda ótrauður áfram... efast samt stórlega um að það sé eining hjá borgarstjórnarflokki sjálfstæðismanna... enginn vildi tjá sig og í raun töluðu myndirnar sínu máli!

Vilhjálmur: Hamrað á því sem mér kemur verst